《謎之超大車牌?!》

《謎之超大車牌?!》

做左咁耐,如果有人問我,咩型號咩年份咩車嘅車牌尺寸,我地都可以即刻講出,連好多同業都經常打黎問。

大致上香港分別左兩派,日系尺寸 同 歐洲尺寸。

今日我地黎探討下點解有啲車個車牌咁鬼大隻!

當中嘅代理者一定係Honda Jazz,車仔細細,個尾車牌老連咁大,好多車主一攞左車,就搵我地換番個正常合適尺寸嘅車牌。

但係問題黎喇,代理用個車牌個尺寸非常大,7吋x19寸,又用非常多膠貼,係一個平面上要拆除一個咁貼服嘅牌係有難度,

因為要大車牌變正常車牌(6 ¾ 吋x13吋),要無痕無跡就要睇番本身已經冚住幾耐,本身有冇被刮花等因素。

咁點解代理要揀呢個鬼死咁大尺寸呀?明明日本Fit個尺寸咁岩!

因為呢,當年廿年前有個風氣車牌越大越豪華,競爭激烈,所以Honda當年全部車嘅尾牌都使用超大尾牌正方字仲加埋網紋底,好似當年嘅勞萊尺寸咁款,雖然而家啲Jazz可以挑戰拉利(咦)。

但係,十幾年前運輸署有一日出信,叫各大代理要用法例所列嘅字體唔好加網紋,之後呢樣野就係代理出嘅車牌上絕跡左,大家嘅車牌都有左個初步標準咁。

大家所見,而家代理出嘅新車牌大部份都有一個標準,合適嘅尺寸,不會過大過細,但係Honda一樣依然自我,Jazz個尾牌一樣巨大化。

咁代理鐘意裝咁大車牌關我鬼事咩?

咁又唔係咁講喇,之後都係我地執手尾,又有以下缺點:

過大車牌遮掩大片車漆,無法清潔,加速該位置車漆惡劣氧化。

拆除風險大,過大車牌使用過多膠紙,該海棉膠紙又非常難清理。

視覺上細車大車牌非常笨重。

細變大就易,大變細就難架喇。車牌唔同男人,係宜細(標準合適),不宜大呀。

Comments are closed.

Supporter of Content Protector FantasticPlugins.com